Сенатор: Байдың балаларына айыппұл төлеу оңай, сол үшін жол ережесін бұза береді

Сенатор Марат Қожаев жол қозғалысы ережелерін қасақана және бірнеше рет бұзатын жүргізушілер туралы пікір білдірді. Оның айтуынша, олар мұны әдейі, саналы түрде жасайды.

"Күн сайын жол ережесін өрескел бұзатындар автобус жолағымен жүреді, қоғамдық көлікке кедергі келтіреді, жоғары жылдамдықпен қозғалады және мұның бәрін әдейі жасайды. Осындай жүргізушілердің бір тобы – қымбат көліктер мінген, бай отбасылардан шыққан жастар. Олар үшін бұл – жай ғана ақылы бар жол сияқты. Айыппұл –  олар үшін жай шартты төлем ғана. Олар жолда жүйткіп жүріп, басқа жүргізушілерге қауіп төндіреді", – деді депутат Сенат кулуарында.

Оның айтуынша, кейбір жүргізушілер бір жылда 100-ден 150-ге дейін жол ережесін бұзады. Осындай адамдарға жол ережесін бұзғаны үшін салынатын айыппұлдарға 50% жеңілдікті алып тастау жоспарланып отыр.

"Егер бір адам 10 рет бірдей сипаттағы ереже бұзса, онда 11-ші рет жеңілдік берудің қажеті жоқ деп ойлаймын. Бұл шара қарапайым адамдарға емес, жол ережесін әдейі, жиі бұзатын азғантай топқа қатысты", – деді Қожаев.

Бір жылдың ішінде шамамен 195 мың жүргізуші жол ережесін 10-нан 50 ретке дейін бұзған. Ал бірнеше мың адам – 100 ретке дейін.