Шерзат Полат ісі: Сот отырысты Талдықорғаннан Алматыға көшіруден бас тартты

Бүгін Талдықорған қаласында Шерзат Полатты өлтіру ісі бойынша сот процесі басталды. Сот Ержан Жанұзақов тараптардың сот процесін Талдықорғаннан Алматыға ауыстыру туралы өтінішін қанағаттандырмады.

17 сәуірде сот отырысы адвокат Калиеваның кешігуіне байланысты 35 минутқа кеш басталды. Сот адвокатқа ескерту жасап, келесіде тағы кешіксе, сотқа құрметсіздік көрсеткені үшін жауапкершілікке тартылуы мүмкін екенін айтты.

Осыған байланысты айыпталушылардың бірінің қорғаушысы Абенов сот отырысын Алматыға көшіруді ұсынды:

"Бүгінгі кешігуді өздеріңіз де көріп отырсыздар, уақытымыз босқа кетті. Біз сізге бұл істі Алматыдағы изоляторға көшіру туралы өтініш жазамыз. Өзім сол жақта ірі істерге қатыстым. Алматы – барлық қалалардың ішінде  бізге ең жақын орналасқаны. Осы нұсқаны қарастыруыңызды сұраймын", – деді ол.

Ұқсас өтінішті жәбірленуші тараптың адвокаты Мейірман Шекеев те айтты. Ол Талдықорғанға жол ұзақ екенін алға тартып, егер процесс Алматыға ауыстырылмаса, онлайн қатысуға рұқсат сұрады.

Шерзаттың әжесі де ұзақ жолда қан қысымы көтерілетінін айтып, сотты көшіруді өтінді. Сот оған сот процесіне қатысудан босату туралы өтініш жазуға болатынын айтты.

"Сіздер алты адвокатсыздар. Егер бір-екеуіңіз қатыса алмасаңыздар да, сотты жалғастыра береміз. Онлайн қатысуға мүмкіндік жоқ, өйткені трансляция жүріп жатыр. Онлайнда сіздердің дауыстарыңыз естілмей қалуы мүмкін немесе техникалық ақаулар туындауы ықтимал", – деді Ержан Жанұзақов.

Айта кетейік, процесті сот Ержан Жанұзақов қарайды. Прокурорлар – Ержан Құрақбаев пен Дана Сәрсенбай.

Іс бойынша тоғыз адам айыпты болып танылған. Олардың бірі – кәмелетке толмаған. Оларға "адам өлтіру", "адам өлтіруге оқталу", "ұрлық", "бұзақылық" және "қылмыс туралы хабарламау" фактілері бойынша қылмыстық іс қозғалды.

А. Шынасыл мен Р. Сакиевке тағылан айыптар:

• Қылмыстық Кодекстің 99-бабы. "Адам өлтіру";
• 24-бап. "Қылмысқа дайындалу және қылмысқа оқталу",  
• 293-бап. "Бұзақылық".

А. Тоқтаубаевқа тағылған айыптар:

• 293-бап. "Бұзақылық";
• 188-бап. "Ұрлық".

Д. Әскентай, Ш. Белғожаев, Н. Ильясов, Н. Тоқтаубаев, Д. Қалиахметке 293-бап "бұзақылық" айыбы тағылған.
Кәмелетке толмаған Д. Ы-ға Қылмыстық Кодекстің 434-бабы "қылмыс туралы хабарламау" бойынша айып тағылды.