"Кальмар ойыны" (Squid Game) екінші маусымы Netflix платформасында қаралым саны бойынша рекорд орнатты. 2024 жылдың 26 желтоқсанында жарыққа шыққан туындыны көрермендер алғашқы аптада 68 млн рет көрген. Оның алдыңғы маусымнан ерекшелігі қандай? Көпшіліктің көңілінен шықты ма? Үшінші маусым қашан жарыққа шығады? Оқиға қалай жалғасуы мүмкін? Жауап іздеп көрдік.
Екінші маусымның ерекшелігі қандай?
Сюжет: Бас кейіпкер №456 нөмірлі ойыншы Сон Ги Хун (Ли Чон Чжэ) қауіпті ойынға қайта оралады. Мақсаты — ойынды ұйымдастырып отырған адамдардың бетпердесін шешіп, оларды тоқтату. Ол басқа ойыншыларды да қатарына қосып алуға тырысады. Алайда бұл жолы да №001 ойыншы тосынсыйға толы болып шығады. Сонымен қатар ойын түрлері өзгеріп кеткен, ұйымдастырушылар барлығын қиындатып жіберген.
Актерлік құрам: Ли Чон Чжэмен бірге бірінші маусымда ойын жүргізушісін сомдаған Ли Бен Хон, ойынға адам жинайтын кейіпкерді жандандырған Гон Ю және полиция қызметкері Ви Ха Джун да бой көрсетеді. Сонымен қатар Им Сиван, Кан Ха Ныль, Пак Сун Хун және Ян Дон Гын және тағы басқа да актерлер бар.
Ал жаңа кейіпкерлер қатарында криптовалютамен айналысамын деп қарызға батқан жігіт, бұрын сарбаз болған трансгендер, жастар арасында танымал рэпер, аяғы ауыр болып барар жері қалмаған жас қыз, құмар ойнап қарызға батқан ер адам мен сол баласын құтқарғысы келетін ана секілді өмірде "жолы болмаған" адамдар бар.
Көрермен қалай бағалады?
Екінші маусым Metacritic платформасында 61 балл жинады. Оған 34 адам пікір қалдырған. Оның 17-сі — оң, 16-сы — аралас, 1-і — теріс пікір.
The Hollywood Reporter сыншысы бұл маусымды өте төмен бағалады.
"Шынында, бұл мүлде толық бір маусым емес. Бұл 2025 жылы шығатын үшінші маусымның алты сериядан тұратын кіріспесі іспетті", — деп жазды.
Оның жазуынша, кейіпкерлердің тағдыры онша ашылмаған. Екі серияны Сон Ги Хунның ойынға оралуына арнағаны да көрерменді жалықтырып алуы мүмкін. Десе де, ол бұл тәсіл арқылы режиссер бас кейіпкердің ішкі хәлін, қаншалықты күйінгенін, не үшін кек алғысы келетінін көрсеткісі келгенін айтады.
Бұл пікірмен The Guardian авторы да келіседі. Ол сахнаның бұлай созудың және жалпы оқиғаның жалғасын түсірудің қажеті жоқ екенін айтты. Себебі, оның пікірінше, бірінші маусым толықтай аяқталған туынды, екінші маусымды түсіруге тек коммерциялық мүдде мәжбүр еткен. Дегенмен, сыншы сериалдың денсаулық сақтау саласындағы қымбатшылықты көтергенін ұнатқан.
Ал Variety әлдеқайда жағымды рецензия жариялап, жаңа маусымды "қан төгіске толы әрі таңғаларлықтай тартымды" деп сипаттады. Журналистің пікірінше, екінші маусым бірінші маусымның сюжетін дамытып қана қоймай, сонымен қатар капиталистік эксплуатация, моральдың құлдырауы және әлеуметтік теңсіздікке жаңа көзқарас ұсынады.
"Сюжет жоспарланбаған жүктілік, криптовалютаның тұрақсыздығы сынды басқа да заманауи мәселелер немесе ықпалды адамдардың жастардың өміріне қалай әсер ете алатынын көрсеткен (...) Сериал антиутопиядан гөрі, үнемі нашарлап келе жатқан жаһандық дағдарысты көрсетеді", — делінген мақалада.
Айта кетейік, "Игра в кальмара" бірінші маусымы Metacritic-те 13 рецензия бойынша 69 балл жинаған еді.
Екінші маусым неге шолақ аяқталды?
Әлеуметтік желідегі пікірлерге сүйенсек, екінші маусым 7 бөліммен бітіп кеткеніне қатысты шағым көп болды. Себебі, екінші маусымда ойыншылар алты ойынның тек үшеуін ғана ойнап үлгерді, Сон Ги Хунның жоспары сәтсіз аяқталды, полиция аралға әлі жеткен жоқ. Дегенмен, бұған қатысты режиссердің өз жауабы бар.
"Екінші және үшінші маусымның сценариіне арналған хикая өте ұзақ болып кетті. Бастапқыда мен оны 8-9 эпизодқа сыйдыруды жоспарлағанмын, бірақ хикаяны толық аяқтағанда қарасам, 10-нан астам эпизод шығыпты. Оны бір маусымға сыйғызса, тым ұзақ болып кетеді деп ойладым. Сондықтан екінші маусымды аяқтап, үшінші маусымға өтуге болатын сахна керек болды. Ал Ги Хунның оқиғасына келсек, оның ойынды тоқтатуға тырысқан барлық әрекеті сәтсіз аяқталды. Адам жалдап, бақылау құрылғысын орнатуы, ойынды тоқтату үшін ойыншыларды қарсы дауыс беруге үгіттеуі, сосын ойыншыларды біріктіріп, ойын ұйымдастырушыларына қарсы бүлік шығару мақсаты да іске аспады. Ең жақсы досы Джон Бэден айырылып қалды. Осы оқиғалар Ги Хунның келесі маусымдағы табиғатын ашуға таптырмас сахна деп ойладым. Себебі бұның бәрі оған өте ауыр тиеді. Енді ол ары қарай қалай әрекет етеді? Бұл әрі қарай дамитын оқиға", — деді Хван Дон Хек.
Үшінші маусым қашан шығады?
Everyone say hi to Chul-su 👋 Squid Game 3 coming 2025. pic.twitter.com/hCgNexjJbC
— Netflix (@netflix) January 1, 2025
Сериалдың үшінші маусымы 2025 жылдың жаз немесе күз айларында жарыққа шығуы мүмкін. Бұл туралы туындының режиссері әрі сценаристі Хван Дон Хек Variety-ге берген сұхбатында айтты. Режиссердің айтуынша, екінші маусымның соңындағы титрлардан кейін үшінші маусымға қатысты мәліметтер көрсетіледі.
Сонымен қатар, Netflix платформасы жаңа маусымның алғашқы постерін жариялап, онда "Қызыл жарық – Жасыл жарық" ойынындағы Йон Хи және Чоль Су атты қуыршақтарды көрсетті. 
Сериал үшінші маусыммен аяқталады.
Осыдан біраз уақыт бұрын Netflix-тің Оңтүстік Кореядағы Youtube арнасында үшінші маусым 2025 жылдың 27 маусымына жоспарланғаны туралы ақпарат шыққан, бірақ көп өтпей арна ол ақпаратты өшіріп тастады.
Оқиға қалай өрбуі мүмкін?
Қазіргі уақытта үшінші маусымның нақты сюжет желісі туралы толық ақпарат жоқ. Алайда әлеуметтік желі қолданушылары оқиғаның өрбуіне қатысты болжамын жарыса жазып жатыр.
№1 болжам: Бірінші маусымда №001 ойыншы болған О Иль Нам ойын жүргізушісі әрі екінші маусымның №001 ойыншысы Хван Ин Хоның әкесі болып шығуы мүмкін. Себебі бірінші маусымда №456 ойыншы сүт іше алмайтынын айтқан кезде О Иль Нам баласының да сүт іше алмайтынын еске алған еді. Екінші маусымда Хван Ин Хо да өзіне берілген сүтті ішпей, аяғы ауыр ойыншыға бере салады.
№2 болжам: Жүргізуші Хван Ин Хо да — бұрын осы ойынға қатысып, жеңіп шыққандардың бірі. Оның екінші маусымда №456 ойыншыға өз өмірі, әйелінің ауырғаны туралы айтқаны шын. Яғни, ол кезінде әйеліне донор тауып, ота жасату үшін осы ойынға қатыстып, жеңіп шыққан. Алайда, үлгермей қалған. Содан кейін өмірден түңіліп, ойын ұйымдастырушыларының қатарына қосылған. Тіпті, ойыннан "шығып" қалғандардың ағзасын донорға сатып жүрген де сол болуы мүмкін.
№3 болжам: Екінші маусымдағы Таностың "командасындағы" ұялшақ және өте қорқақ жігіт, №125 ойыншы Мин Су бірінші маусымда VIP қонақ болған. Көрермендер сериал туралы ақпаратты мұқият зерттей келе, Мин Суды сомдаған актер Дэвид Лидің "Кальмар ойынының" бірінші маусымында алтын бұғы маскасын киген VIP қонақтың рөлін сомдағанын анықтады. Демек, тек жүргізуші ғана емес, VIP қонақтардың бірі де адреналин сезіну үшін ойынға араласқан деген болжам бар.
