Сәкен Майғазиевтің ұлының тойын тамашалау – 1380 теңге. Қазақстандағы ерекше тойларға шолу

Бүгін сағат 17.00-де Сәкен Майғазиевтің ұлының тойы басталады. Тойға 800 қонақ шақырылған. Ал мейрамханаға сыймағандар немесе келе алмағандар, сондай-ақ тойдың қалай өтетінін көргісі келетін кез келген адам трансляцияға ақы төлеп, онлайн тамашалай алады. Әншінің өзі бұл оқиға тарихта қалады деп отыр. 

Қазақстанда той бизнесі жақсы дамыған. Қуанышын ерекше етіп атап өткісі келетіндер көп. Бірі ерекше киінсе, бірі ерекше кортежбен жүреді. Осы орайда Информбюро порталы Қазақстандағы ерекше тойларға шолу жасады.

Сәкен Майғазиевтің ұлының тойы

Танымал әнші Сәкен Майғазиев көпшілікті ұлы Әділет пен келіні Әдияның үйлену тойын онлайн көруге шақырды. Тікелей эфирге қосылу құны – 1380 теңге. Ерекше ұлттық реңкте той өткізетінін жариялаған әнші бұл ақшаны пайда табу мақсатында жинап отырмағанын айтты.

Тойдың продюсері Жан Мұқанов онлайн тамашалау үшін неге ақша төлеу қажет екенін түсіндірді.  

"Бұл – тойдың өзі ғана емес, бұл –  ұлттық мәдениеттің, отбасылық құндылықтың, өнер адамының өміріндегі тарихи сәт. Бұл оқиғаны әдемі, әсерлі етіп көрсету үшін кәсіби режиссура, сапалы камералар, жарық, дыбыс, тікелей эфир платформасы керек және ондаған маман тарихта қалатын той жасау үшін күн-түн демей еңбек етіп жатыр. 1380 теңге – табыс емес, бұл – шығындарды жабу жолы. Бұл – жаңа қадам, жаңа тәжірибе. Әлемде бұл қалыпты тәжірибе. Жаңа жылдағы Victoria’s Secret шоуы, Британия ханзадаларының тойлары, Netflix трансляциялары – бәрі де pay-per-view. Сакен ағамыздың тойын да дәл сондай құрметпен, кәсіби түрде көрсетпеске? Бұл эфирдің мақсаты пайда табу емес. Мақсат – ұлттық мәдениетті әдемі түрде құжаттау. Эфирдің құны тек техникалық шығындарды жабуға жұмсалады. Біз ешкімді мәжбүрлеп жатқан жоқпыз. Бұл – той емес, тарих", – деп жазды Жан Мұқанов.

Гауһар тас таратылған той

Айтыскер ақын Айнұр Тұрсынбаева 2022 жылы жалғыз ұлы Бегланның тойын Түркияның Ыстамбұл қаласында жасады. Ол той қызықтарын Instagram-парақшасына салып отырды.

Той алдында беташар, салтанатты неке қию рәсімі өтті. Жас келіннің бетін ақын Жандарбек Бұлғақов ашса, екі жастың некесін әнші Алтынай Жорабаева қиды.

Посмотреть эту публикацию в Instagram

Публикация от Айнұр Тұрсынбаева (@aidyn_nury)

Қазақстаннан танымал өнер адамдары тойға жиналды. Қыдырәлі мен Қарақат, Сәкен Майғазиев, Мейрамбек Бесбаев, Қайрат Нұртас пен Гүлзира Айдарбекова, Тамара Асар, Ерке Есмахан, Ерлан Көкеев, Тұрсынбек Қабатов, "Алатау серілері" тобы және өзге де өнер иелері тойға қатысты. 

Тойда қызық ойындар ойнатылып, сыйлыққа гауһар тас берілді. Кейінірек той яхтада жалғасқан. 

Қайырымдылық жасаған жұбайлар

2019 жылы астаналық екі ерікті мейрамханада той жасамай, атаулы күнді мектеп-интернатта балалармен бірге атап өтуді жөн көрді. Дидар Сәтбаев пен Лаура Жүнісбекова қайырымдылық жасап жүрген кезде танысқан. Олар интернат тәрбиеленушілеріне сурет салу және жауынгерлік әдістерді меңгеруден тегін сабақ берген. Екеуі де қомақты қаржы жұмсап, той жасағысы келмеген. Одан гөрі балаларға қуаныш сыйлап, көңілдерін көтеріп, сыйлық жасауды жөн санаған.

Олардың туыстары да түсіністікпен қарап, екі жастың бастамасын қолдаған.

"Бізбен бірге қуанып, көңіл көтерген балалардың көңіл-күйіне жететін ештеңе жоқ. Жастарды мейрамханада той жасап, миллиондап ақша шашқанша, қаржыны игі істерге жұмсауға шақырамыз" – деді Лаура.

Ерекше киінген Айжұлдыз бен Сәкен

Биыл көктемде әнші Жанар Айжанованың қызы, актриса Айжұлдыз Адайбекова мен блогер Сәкен Қағаров үйлену тойында ерекше үлгідегі киім киді. 

Айжұлдыз классикалық қалыңдық көйлегінен бас тартып, ұлының салған суреттері бейнеленген жейденің үстінен ақ бүрмелі көйлек киіп, гүл шоғының орнына түрлі-түсті тәттілерден жасалған букет ұстады. Ал күйеу жігіт ашық түсті, принтпен көмкерілген пиджак, қара шолақ шалбар мен сызықты шұлық киіп, классикалық смокингтен алшақ образ таңдады.

Посмотреть эту публикацию в Instagram

Публикация от Julie) (@aizhuldyz_adaibekova)

Айжұлдыз бұл идеяны Анджелина Джолиден алғанын айтты. 

Той ашық аспан астында екі жастың жақындарының ортасында өтті. Жас жұбайларды әнші Тамара Асар мен басқа да жұлдыздар құттықтап, әлеуметтік желіде жүрекжарды тілектерін арнады.

Айжұлдыз бата алу тойында да күн мен ай стилінде ерекше киінген болатын.

2018 жылы Шымкентте өткен үйлену тойдың бірінде 1500 келі болатын ерекше торт қоғамның назарын аударды. Брнеше қабатты торт қамал пішінде жасалған. Биіктігі 4,2 метр, диаметрі 3 метрге жеткен торт арнайы платформа арқылы залға жеткізілген. Көпшілік мұндай үлкен тортты алғаш рет көргенін жазды.

Бұл тортты ресейлік танымал кондитер Ренат Ағзамов әзірлеген. Ол торттың дайындалуына бірнеше күн кеткенін және арнайы командамен жұмыс істегенін айтты. Торттың бағасы 179 мың АҚШ доллары тұрады.

Посмотреть эту публикацию в Instagram

Публикация от RENAT AGZAMOV (@renat_agzamov)

Қоғамда бұл тортқа қатысты көзқарас екіге жарылды. Бірі мұндай салтанатты шараны шектен тыс сән-салтанат деп қабылдап, қарапайымдылықты дәріптесе, екіншілері бұл – жеке таңдау, эстетикалық шоу мен қуаныштың белгісі деп бағалады.

Бұл оқиға тек торттың көлемімен емес, елде той мәдениеті, ысырапшылдық, сән-салтанат туралы пікірталастарды қайта қозғады.