Ағаш қауіп төндірсе, тұрғындар қайда хабарласуы тиіс? Түсіндіреміз

№1 Жергілікті әкімдікке жүгіну

Алдымен ағаш орналасқан аумаққа қарайтын аудандық әкімдікке ресми өтініш жазу керек. Өтініште мына мәліметтер көрсетіледі:

• ағаштың нақты тұрған мекенжайы;
• ағашты кесу себебі (құрғақ болып қалуы, құлап кету қаупі, инженерлік желілерге кедергі келтіруі немесе құрылыс жұмыстарына тосқауыл болуы);
• өтініш берушінің байланыс деректері.

Өтініш қағаз түрінде де, электронды түрде де қабылдануы мүмкін.

№2 Мамандардың тексеруі

Әкімдік өтініш түскеннен кейін арнайы комиссияны немесе экология саласының мамандарын жібереді. Олар ағаштың жай-күйін тексеріп, оның шынымен қауіп төндіріп тұрғанын не тұрғызуға кедергі келтіріп жатқанын анықтайды.

Тексеру барысында ағаштың жасы, түрі, зақымдану деңгейі есепке алынады. Нәтижесінде арнайы акт толтырылады.

№3 Рұқсат құжаты

Егер комиссия ағашты кесуге негіз бар деп тапса, аудандық әкімдік ресми түрде рұқсат қағазын береді. Бұл құжатсыз ешбір ұйым немесе жеке тұлға ағашты кесуге құқылы емес.

Кей жағдайларда әкімдік ағашты кескеннен кейін оның орнына жаңа көшет отырғызуды міндеттейді. Бұл қаладағы жасыл желекті сақтап қалу үшін жасалады.

№4 Кесу жұмыстары

Рұқсат берілген соң ағашты әкімдік өзі келісімшарт жасаған мердігер ұйым арқылы кеседі. Ал кейде тұрғындарға арнайы лицензиясы бар қызмет көрсетушілерді шақыруға рұқсат етіледі.

Қауіпсіздік шаралары қатаң сақталуы тиіс, себебі көпқабатты үйлердің ауласында ағаш кесу кезінде тұрғындарға немесе мүлікке зиян келуі мүмкін.

№5 Ерекше жағдай

Егер ағаштың құлау қаупі жоғары болып, тұрғындардың өміріне немесе мүлікке төнген қауіп анық байқалса, уақыт жоғалтпай 109 – iKomek бірыңғай байланыс орталығына хабарласу қажет. Бұл қызмет тәулік бойы жұмыс істейді және шұғыл әрекет етуге жауап береді.

№6 Мемлекеттік мекеме аумағында өсіп тұрған ағаш қауіп төндірсе ше?

Егер қауіпті ағаш мектеп, балабақша немесе басқа мемлекеттік мекеменің аумағында өсіп тұрса, оны да рұқсатсыз кесуге болмайды. Мұндай жағдайда әрекет ету тәртібі сәл өзгеше болады:

1. Мектеп әкімшілігіне ресми түрде жүгіну

• Директордың атына жазбаша өтініш бересіз.
• Өтініште ағаштың нақты тұрған жерін, қандай қауіп төндіріп тұрғанын (құлау қаупі, балаларға қауіп, ғимаратқа зақым келтіруі) сипаттап жазу қажет.

2. Білім басқармасы немесе аудандық әкімдікке шағымдану

• Егер мектеп шара қолданбаса, тиісті аудандық әкімдікке немесе Алматы қаласының Білім басқармасына жазбаша арыз түсіруге болады.
• Әкімдік комиссия құрып, ағашты тексеріп, шешім қабылдайды.

3. Төтенше жағдайлар департаментіне хабарлау

• Ағаш құлау қаупі жоғары болса, уақытты созбай Алматы қаласының Төтенше жағдайлар департаментіне (101 немесе 112) хабарласу қажет. Олар жағдайды тексеріп, шұғыл шара қолдана алады.

4. 109 – iKomek бірыңғай байланыс орталығы

• Бұл қызметке де өтініш қалдыруға болады. Олар шағымды тиісті мекемеге жолдап, орындалуын қадағалайды.

5. Азаматтық бастама

• Кейде ата-аналар комитеті немесе тұрғындар бірлесіп арыз жазса, мәселе тезірек шешімін табады.

Егер мектеп ағашты "бюджет жоқ" немесе "құжат рәсімделмеген" деген себеппен кеспей жатса, әкімдік немесе экология басқармасы оны орындауға міндеттей алады. Себебі ең бастысы – балалардың қауіпсіздігі.