AlHuda CIBE ТМД елдерінде исламдық қаржы бойынша роудшоу өткізеді

Исламдық банкинг және экономика орталығы AlHuda CIBE 2025 жылы ТМД елдерінің алты ірі қаласын қамтитын ауқымды CIS Islamic Finance Roadshow 2025 бастамасының іске қосылғанын қуана хабарлайды. Бұл бастама исламдық қаржы жүйесін дамыту мен оны кеңінен таныстыруды мақсат етеді.

Roadshow 2025 жылы 3-4 қыркүйекте Беларусь астанасы Минскіде басталып, одан әрі Баку (Әзірбайжан), Алматы (Қазақстан), Ташкент (Өзбекстан), Бішкек (Қырғызстан) қалаларында жалғасып, 18 қыркүйекте Душанбе (Тәжікстан) қаласында аяқталады.

Іс-шара исламдық қаржының инклюзивтілігін арттыру, шариғат талаптарына сай инвестициялар тарту және қаржылық реттеуді дамыту арқылы ТМД аймағында исламдық қаржы жүйесінің инфрақұрылымын күшейтуді көздейді. Роудшоу аясында жоғары деңгейдегі саяси диалогтар, техникалық семинарлар, инвесторлармен іскерлік кездесулер, қаржы ұйымдары мен реттеуші органдарға сапарлар жоспарланған.

2025 жылдың басындағы мәлімет бойынша, ТМД аймағында 18 ислам банкі және 14 исламдық қаржы ұйымы жұмыс істейді. Олардың қатарына Takaful (исламдық сақтандыру), микрокаржылық мекемелер, лизингтік компаниялар және исламдық финтех-стартаптар кіреді.

Қазақстан аймақтағы көшбасшы ретінде танылып отыр. 2024 жылы ислам банктерінің активтері шамамен 600 млн АҚШ долларын құраса, 2028 жылға қарай бұл көрсеткіш 1,2 млрд долларға, ал 2033 жылға дейін 2,1 млрд долларға жетуі мүмкін. Сонымен қатар, сукук (исламдық облигациялар) нарығы 2028 жылға дейін 700 млн долларға жетеді деп күтілуде.

Роудшоу барысында келесі тақырыптар қамтылады: ислам банкингінің үздік тәжірибелері, Takaful және Retakaful құрылымдары, сукук шығару және капитал нарығын дамыту, микрофинанс және қаржылық инклюзия, реттеуді үйлестіру және финтехті біріктіру, адами капитал мен кадр дайындау мәселелері.

"ТМД аймағы исламдық қаржыға қатысты трансформациялық кезеңді бастан өткеріп жатыр. Реттеуші органдар мен мүдделі тараптар тарапынан ашықтықтың артуы бұл салада тұрақты және инклюзивті қаржы жүйесін құруға жол ашады. Біз бұл роудшоу арқылы білім, реттеу және инвестиция салаларындағы олқылықтардың орнын толтырып, дамуға серпін бергіміз келеді", – деді AlHuda CIBE бас директоры Мұхаммед Зубаир мырза.

Сондай-ақ ол, исламдық банк, сақтандыру және лизинг салалары кез келген елдің қаржылық архитектурасының негізі екенін, ал олардың ислам қағидаттарына сай жүргізілуі ТМД елдерінде тұрақты экономикалық дамуға ықпал ететінін атап өтті.